तपोभूमी

“।। गुरू वचन प्रतिपालन हेंचि शिष्याचे मुख्य लक्षण ।।” हे समर्थ रामदासांचे ‘दासबोधातील’ वचन सार्थ करीत जगदगुरू श्री सिद्धारूढ महास्वामीजी व परम श्रद्धेय श्री शिवकुमार स्वामीजींच्या कृपापात्र परम शिष्या परम पूज्य सु. श्री. मनीषा दिदीजींनी सदगुरूं प्रेरणेने २०१० साली प्रेम भक्ति साधना केंद्राची स्थापना केली. महाराष्ट्र व गोवा येथे ठिक-ठिकाणी सत्संग केंद्र स्थापन करून साप्ताहिक साधना व ध्यान शिबीर प्रारंभ केले.

२०१३-१४ साली कळवण तालुक्यातील निवाणे या छोट्याश्या गावात सत्संगातील सहहृदय भाविकांनी भूमी दान केले व प्रेम भक्ति – श्री सिद्धारूढ आश्रमची, स्थापना सदगुरू प्रेरणेने झाली. प्रथमतः फक्त गवताची कुटी बांधुन दिदीजीं नी ह्या परिसरात ध्यान साधनेला सुरुवात केली. साधनेची अध्यात्मिक शक्ती व सदगुरू चरणांची अतूट श्रद्धा या दैवी संपत्तीच्या आधारे सदगुरू कृपेचा अनुभव परम पूज्य दिदीजींनी समस्त सदभक्तांना प्राप्त करवून दिला. हळूहळू सदगुरू कृपेचा अनुभव पंचक्रोशीतील सदभक्तांना येऊ लागला आणि कळत नकळत ते आश्रमाशी जोडले गेले त्यांच्या भौतिक भोगवादी जीवनाला दिशा प्राप्त झाली. आश्रमात सत्संग साधनेद्वारे शुद्ध आचार व विचाराच्या पलनामुळे येणाऱ्या प्रत्येक जीवाला जडत्वातून चैतन्याकडे जाण्याचा मार्ग प्राप्त होत आहे. आश्रमात येणारा प्रत्येक भक्त परमानंद व परमशांतीचा अनुभव घेऊ लागला. हे जीवन परिवर्तन बघुन सदगुरू भक्तिचे स्थायी रूप प्राप्त व्हावे ही तळमळ दिदीजींच्या व सदभक्तांच्या मनात जाणवू लागली. त्यानंतर दिदीजींच्या अथक परिश्रमातून परम पूज्य सदगुरू श्री शिवकुमार स्वामीजी यांच्या आशीर्वादाने आणि शुभहस्ते श्री गणेश, भगवती राजराजेश्वरी माता, स्वयंभु श्री नर्मदेश्वर शिवलिंग या देवी देवतांसहित परम सदगुरू श्री सिद्धारूढ महास्वामीजी याच्या भव्य मंदिराचे भूमिपूजन मे २०१९ मध्ये सम्पन्न झाले. केवळ ७ महिन्यांत १०८ गावांमध्ये सर्व सदभक्तांना सहभागी करून दिदीजींनी विधिवत झोळी फिरवत भिक्षा मागितली आणि मंदिराची निर्मिती केली. फेब्रुवारी २०२० मध्ये सर्व सदभक्तांच्या आणि संत महंताच्या दिव्य सानिध्यात प्राणप्रतिष्ठा महोत्सव संपन्न झाला. दिव्य दंडकारण्य, निसर्गरम्य तपोभूमी व वृक्षवेली यांनी नटलेल्या या परिसराला दिव्यता प्राप्त झाली. नित्य सत्संग साधना, जप, ध्यान, अनुष्ठान यांद्वारे प्रापंचिक जीवनाकडून पारमार्थिक जीवनाकडे वळवून परमानंदाची प्राप्ती आश्रमाद्वारे होत आहे. प्रेम भक्ति साधना केंद्रात दिदीजीं च्या मार्गदर्शनाखाली सनातन वैदिक धर्म संस्कृतीचा प्रचार व प्रसार, रुद्रभिषेक, ध्यान शिबीर, सदगुरू चरित्र ग्रंथ पारायण, बालसंस्कार केंद्र, वृक्ष संवर्धन इत्यादी कार्यक्रम उत्सव आदीद्वारे नवीन, तरुण पिढीला योग्य दिशा देण्याचे महान कार्य सुरू आहे. आज असंख्य भक्तगण मोक्षच्या मार्गावर वाटचाल करीत आहेत. आश्रमात येताच क्षणी प्रत्येक जीव परम शांतीचा अनुभव घेऊन धन्य होतो व गुरू चरणांशी सहज नतमस्तक होतो.